ALUPEC NA SPASU

«2001: A Space Odyssey» (intemporal). Stanley Kubrick

Oportunidadi pa ALUPEC é pa literatura nacional, skrebedu na kriolu, kumesa ta kirsi na têra. Skrebi na kriol pode ser un autêntiku fenóminu si nu lebal ku vontadi di ser komprendidu y ku base finkadu na raíz. Pa kel novu gerason li e importanti define apartir di un base vernakular y kumesa ta abre portas di xintidu kran, mesmu pa ken ki ka ten un kurso universitáriu. É un tóxa vivu ki stá na skrita di kriolu y ki pode ba ta assume diferentis formas, indefinidu, di acordo ku nos investida na êl. Un pensamentu struturadu na kriolu é kapaz de dá un avansu kuantiku a kualker spasu literáriu, puétiku, científiku, ô ótu. Struturas inatus na linguagen humanu moda kel ki Kant define, kantu é fala di imperativus katigórikus, ten se factualidadi na linguajennes y é bon ntendel nes aspectu novu di redefini lingua kriol .

È ka só linguistas ki ten un papel nes processu siklópiku di dá un língua se lugar merecidu ma també cientistas, filósufus, universitárius desinibidus na ses abordagen, skritores di pensamentu livre. Produson literariu debe aumenta na lingua kriol pa kumesa ta faze sentidu. Ku Editoras di livrus abrindu porta pa jovens ki krê skrebe na kriolu (ku algun reserva na kualidadi di skrita y di ideias); ku mas prugramas de TV y Radio na lingua kriolu; sobretudu ku un telejornal na kriôl; ta kria un enviesamentu interessanti na nos manera di posiciona perante mundo (entendidu como colectivo). Si ten un inkonscienti kuletivu é na kriol ki nu ta atxal y é na kel nó di xintidu k'é ta torna materia di arte y pensamentu kontempurâniu... ku kel razon universal ki nu ta dál...

N ta atxa ma luta pa afirma ALUPEC stá mas na editora y na grandes mediuns moda TV y radiu di ki na se profunda gramatizason, istu é, na kel movimentu pa interior disputa gramátikal y mas sin na kel movimentu inversu pa fora di lingua (ki sta enraizadu na un kultura forte) en direson a novus modelus di pensamentu ki ta obriganu reestrutura lingua otu bez sima ta kontici na tud lingua ki ta muda ku tenpu y na kual alguns palavras ta dexa di usadu y otus ta toma lugar .... vulgarizason di ALUPEC y un interdisciplinaridadi ku kampu científiku y filosófiku, pedagógiku, kela ki nu mesti...

... nu faze di konta ma kriol é nos monolitu nêgru... nha guênti!