X... pa Electra: nôs grandi inkógnita

Electra é maior inkognita ki ten na Cabo Verde, em termos di geston i di kapacidadi di soluson de prublemas. Ês é um erro sistemátiku na kualker geston racional di um kasa, di um estado: planeta i universu intêru kumesa pa energia i sê regularizason! Sem kel nu ka ta pôdi faze nada nem siquer tem um ideia di nós própri funsionamentu. Di Elektra dja passa limite, nha guênti. Dj' ê sa ta fika un intropia difícil di resolvi. Xiça!! Desculpan es Xpreson li, leitor.

En vez di buzinon pa kapital debia ta fazeda un romaria de velas pa cidadi. Dja nhós imagina: un multidon, iluminadu apenas pa velas ki kada un stá traze na mon, ta anda na Avenida Marginal ou na Avenida Cidade de Lisboa na mei di sukuru, ta bai manenti ti instalason di Elektra pa bai deposita na sê porta milhares de velas. Ma parcen ma, sima tud alguem dja intendi, si tud bez ki tiver un apagon de Elektra fazedu um romaria, é ta kaba pa bira folklore i passadus di li uns tempos nu ta lê num obskuro revista de turismo internacional álgu n'es stilu li: «Cabo Verde é tambem um país conhecido pela sua romaria silenciosa de velas em tempos de apagão, um problema insóluvel do seu Governo, mas que já se tornou um hábito cultural naquele estranho país da costa ocidental africana». Ayan, parcem m'ê pa Pro Praia i ADECO, na Mindelo, poi di guarda en relason a es tXakóta contra residentes i consumidores.